حبة ورق

حبة ورق...عمري طلع حبة ورق

متكتفين، متستفين، ياللي عنيكوا مغميين

مش شايفة عمري اللي اتسرق

قاضي القضاة قال كلمته

كل الديابة المرعبة هتسيب قفصها وتنطلق

فتفت روحي بين ايديكي...

حب فيكي...وعشق بيكيِ

ياحبيبتي  ياللي مت ليكي وسايبة روحي بتتحرق

بيقولوا مش لاقيين دليل....

بيقولوا كان ايه البديل

وانا لسة دمي نهر جاري في الشوارع والطرق

قاضي القضاة قال كلمته

عمري طلع حبة ورق

بصوا فإيديهم شوفوا دمي...هتلاقوه

بصوا فعينيهم شوفوا عمري...كان صغير

ضيعوه

بصوا فعنين أمي الحزينة المؤمنة

وساعيتها لو قادرين سيبوه

سيبوا الديابة كلهم

ياللا احكموا باللي تشفوه

لو تقدروا روحوا بجراءة

بصوا فعنين امي اللي مات فيها الضيا

وقولولها عمري كان ورق

ادى اللي سرقوه البراءة

بتفتفت روحك ميت حتة ...وبتبدر أحلامك فيها
روحك مش قادرة تعيش ليها
تحدفها تعدي حدود الكون ....
تطرح بين ايدك مليون لون...
وتبص لنفسك فمرايتك وتقول مجنون...
لكن ممكن....
تخرج عفاريتهم تتمكن
وتمد الإيد الكركوبة....
تهدم حلمك طوبة فطوبة...
ويوقعوا بيت كان متسكن
لكن ممكن....
وبتدي عنيك نور للدنيا...
وبرغم عنيك راحت شايف
واقف بتحارب ضلمتهم
والحلم فعينك مش خايف
ياعيونك تشرق ِفوق موتي
وتصبر روحي على سكوتي
وتقول انا لسة اكيد واقف
كان نفسي فيوم ارفع عيني
وأبص فعينك مش عارف
ولساني اتلجلج مش قادر
ينطق غير كلمة .....أنا آسف

العبيد

طب ليه تموت يا ابو ضحكة لان ليها الحديد

لما يكون في لسة ناس مستكترين كلمة شهيد

لما يكون في لسة ناس بيقولو ايه وداك هناك 

لما يكون في لسة ناس رافضة تشوف صورتك ملاك 

لما يقولو كنت خاين ...

ويقولوا عن روحهم بشر 

ياقلوبكم الضلمة الحجر 

ياذنبكم لا يغتفر ...

انتوا صحيح فعلا بشر 

لكن بشر من نوع جديد

انتم عبيد ...انتم عبيد 

كلام

غرقانة فبحور الكلام،
متعلقة فحبة حروف،
 بين موت ولهفة وشوق وخوف،
إزاي تقولي بعشقك وانت هواك حسب الظروف
عمري حروف متبعترة ..مبدورة بين كل السنين ...محتاجة تترتب
ياجملة تايهة بين سطور عمري اللي متكركب
مين اللي قال كل البشر وقت الفراق.... يتجموعوا فمركب
كل البشر مخلوقة ترسم حلمها..
أما أنا قلمي فلم يكتب
كل الكلام قابل يدوب بين ناس وناس
ناس تفتكر لونها دهب
 تطلع خشب، تطلع حطب، تطلع نحاس
العمر لو حبة كلام يبقى اتكتب بقلم رصاص
ومسيره بإديك يتمحي أو حتى يتسرسب
مين اللي قال كل البشر وقت الفراق...يتجمعوا فمركب

واقف فشباكك ببص عليك
وخاد صدى صوتك وبانده ليك -
ازاي نكون واحد... مسكونة يامرايتي
نفس العيون هي ...والضحكة ضحكايتي
وأما اموت ألقى... السلاح فإديك