مسحورة سحر وماتسحرش
محبوسة فـ كلام ماتفهمش
وعشان ينول حبة أماني مشبكة
لازم يفك رموز حياتها المربكة
وينادي باعلى الصوت
ما تفتح لي يا سمسم ألف باب....
"مابيتفتحش"
ماهو أصل صوته اللي اتنبح واللي اندبح
ما بيتسمعش
في ليلة من ليالي كتير
وانا ماشي
لقيت مسحورة طلعت لي
ولا منها قالت لي "بخ"
إجري وخاف
ولا منها قالت لي الدنيا ضحكت لي
وقفت كتير وانا ساكت
ما انا اتعودت أعيش العمر متتاخد
انا واحد
باعيش احلامي من برة
ورغم اني جريت مسافات
ما وصلتش ولا مرة
وفي بلادي صدر مرسوم
بيمنع أي حلم جديد
عشان هتجينا متعبية من برة....
باعيش العمر متتاخد
وعارف إني لو هوصل
لازم لي فانوس يكون سحري
ويطلع منة ميت مارد
و لاجل ما يسكنوا بلادي
يعيشوا ودمهم بارد
وبعد العمر مستني ….
تقوم تطلع لي مسحورة
وغندورة
ضفايرها جدايل ليل مندية
وعينها حكاية مسطورة
يا مسحورة …
انا مستني تاخديني
باسمي يلا ناديني
وشديني….
وماله لو هاعيش مجذوب
مادام هاعرف حكاياتي
اللي منقوشة على جبيني
مادام هاحكيها للدنيا بلا
عفاريت تطاردني و تسبيني
يامسحورة
أنا المجذوب
بتهربي ليه من المكتوب
بعزم ما فيكِ ناديني
بلاش تسيبيني متتاخد
ومستني فانوس سحري
ما فيهش أكيد ولا مارد
ينجيني
انا واحد
ردحذفباعيش احلامي من برة
ورغم اني جريت مسافات
ما وصلتش ولا مرة
جميل اوى استمرى