بتفتفت روحك ميت حتة ...وبتبدر أحلامك فيها
روحك مش قادرة تعيش ليها
تحدفها تعدي حدود الكون ....
تطرح بين ايدك مليون لون...
وتبص لنفسك فمرايتك وتقول مجنون...
لكن ممكن....
تخرج عفاريتهم تتمكن
وتمد الإيد الكركوبة....
تهدم حلمك طوبة فطوبة...
ويوقعوا بيت كان متسكن
لكن ممكن....
وبتدي عنيك نور للدنيا...
وبرغم عنيك راحت شايف
واقف بتحارب ضلمتهم
والحلم فعينك مش خايف
ياعيونك تشرق ِفوق موتي
وتصبر روحي على سكوتي
وتقول انا لسة اكيد واقف
كان نفسي فيوم ارفع عيني
وأبص فعينك مش عارف
ولساني اتلجلج مش قادر
ينطق غير كلمة .....أنا آسف

العبيد

طب ليه تموت يا ابو ضحكة لان ليها الحديد

لما يكون في لسة ناس مستكترين كلمة شهيد

لما يكون في لسة ناس بيقولو ايه وداك هناك 

لما يكون في لسة ناس رافضة تشوف صورتك ملاك 

لما يقولو كنت خاين ...

ويقولوا عن روحهم بشر 

ياقلوبكم الضلمة الحجر 

ياذنبكم لا يغتفر ...

انتوا صحيح فعلا بشر 

لكن بشر من نوع جديد

انتم عبيد ...انتم عبيد 

كلام

غرقانة فبحور الكلام،
متعلقة فحبة حروف،
 بين موت ولهفة وشوق وخوف،
إزاي تقولي بعشقك وانت هواك حسب الظروف
عمري حروف متبعترة ..مبدورة بين كل السنين ...محتاجة تترتب
ياجملة تايهة بين سطور عمري اللي متكركب
مين اللي قال كل البشر وقت الفراق.... يتجموعوا فمركب
كل البشر مخلوقة ترسم حلمها..
أما أنا قلمي فلم يكتب
كل الكلام قابل يدوب بين ناس وناس
ناس تفتكر لونها دهب
 تطلع خشب، تطلع حطب، تطلع نحاس
العمر لو حبة كلام يبقى اتكتب بقلم رصاص
ومسيره بإديك يتمحي أو حتى يتسرسب
مين اللي قال كل البشر وقت الفراق...يتجمعوا فمركب

واقف فشباكك ببص عليك
وخاد صدى صوتك وبانده ليك -
ازاي نكون واحد... مسكونة يامرايتي
نفس العيون هي ...والضحكة ضحكايتي
وأما اموت ألقى... السلاح فإديك

متكركب

لا عيوني عاد فيها الضيا بيضحك
ولاعدش شعري حلو متسبسب
وشي صبي وتحسه لون وردك...
لكن فقلبي الحزن متكركب
ياللي عاطتني البحر خالي الشطوط
إزاي تسيبني هناك بلا مركب

my son & his lovely girlfriend

آه والله

ياللي فاكرني صاحي بتنفس..
مش كل من فتح عينيه شايف...
دنيا بنخبط فيها ونحسس...
 ولاعمرها ضمت صغير خايف..
نفسي أبوسك مرة واتأسف
لكني مخلوقة بلا شفايف

ماريونيت

كله متعلق ف خيط...
كله مربوطله الجرس..اللي ثاير والغلابة والحرس..
كله بيلف فدواير...كله بيعيش المآسي..
.ناس بتعجبها الستاير..ناس بتعجبها الكراسي
ناس بتسأل يا حماسي ....ليه سكت؟
ياللي مش عارف حقيقتك
ياللي مش عارف حقيقتي
مرة زيك اتفاجئت
إننا في الأصل شلة من عرايس ماريونت
كله مستني الايدين اللي بتحرك خيوطه
اللي بتحدد حياته...واللي بتحددله موته
مين يلومني عن سكوتي
مين ألومه عن سكوته

مين يحركني بإيده
مين يسلف صوتي صوته
نفسي اقول اني تعبت
كلنا في الأصل شلة
من عرايس ماريونت