عذاب الورد
ساعات الورد بيدندن
ودندنته بتتجنن ... ويتمرد على سكونه
بيتمرد ويتمرر .. وأحزانه بتتكرر
فيهجر صبره وفنونه
في وطنه غريب ومتحسر .. وأحلامه بتتكسر
وتتسرسب بعيد عنه جدوره وأرضه وحصونه
وبيشيل ذنب مش ذنبه
ويدبل فيه دفا قلبه
ويدبل فيه خضار لونه
ساعات الورد بيدندن ويتمرد على سكونه
وقالوا عليه كتير خاين
هيجر أرضه ويسيبها
وعيشه وملحة مش صاين
ده قال يوم إنه حاببها
ومين قال إنه مش حابب ... ؟!
ومين قال إنه مش دايب
ده عمر ما جا على باله وهو بيحبى في ترابها
يصير في شبابه ليه شايب ولا يعرفش أسبابها
ده لون الذل فى عيونه
ساعات الورد بيدندن ويتمرد على سكونه
ده بستان فيه ورود ياما
وأحلامهم بعيد طايره
وواخدهم فى دوامه
ورود والدنيا قدامها
بتتشعلق فى أحلامها
وإيدها قصيرة تعمل إيه
بتبنى ف دنيا هدامه
يا ورد ف أرضك الزينة
ومش عيبك ولا عيبها
بأنك ورد فى جنينه
ومش عيبك ولا عيبها
يا ورد النيل فى يوم تكتر ما تحسبها
عشان الحلم فيك بحار ....
بلا مرسى ولا مينا
دا ورد النيل صبغ لونه
ولون الغربة معجونه
وعُمر ما كان ده عيب الورد
وعمر ما كان ده عيب الأرض
ده عيب بستاني ماله عهد وبيخونها وبيخونه
ساعات الورد بيدندن ويتمرد على سكونه
ليست هناك تعليقات:
إرسال تعليق