أنواع الدم كتير
دم خفيف .. دم تقيل
ودم رخيص
متنتور فوق القصاقيص
صورة شاب فإيده حجارة
واقف شاهر حلمه منارة
قرر يتحدى إبليس ...
غرقت بالدم القصاقيص...
متربى على إنى فحالى
وفر على نفسك أسئلتك
ردى عليك هيكون وأنا مالى؟!
أوعى تقولى دمنا واحد
دمى أنا ما النوع الغالى
أما أنت بقى دم رخيص...
دمك مصري ؟!
أنا دمى بقى نوع مستورد
آخر صيحة من التجديد
بيخليني أشوفك وأنت عينيك محتارة
واقف تتحدى القناصة وناس جبارة
وأنا باكتب وباقول أناشيد...
إنسانى بكل المقاييس
وأوعى تقولها بإنى خسيس
دانا دورى أن أنا بتكلم
وأنت بقى اللى عليك تتألم
والبوم والغربان هتهيص....
آخر حاجة هاقولها يا صاحبى
لبشر معدومي الأحاسيس
بيسقفوا ويغنوا كتير
أوسكار في فنون التشخيص
البطل الصادق كان عادي
واحد عادي...بيحلم عادي
غنى فسره بحب بلادي
واستشهد جوا الكواليس
ليست هناك تعليقات:
إرسال تعليق