حضن القوارب
مين اللي قال كل اللي عنده عينين مفتح؟
مين اللي قال كل اللي متعلم بيفلح؟
مين اللي قال شعري يشيب وانا لسة متشبث ببابك
واقف هنا وبرغم إن الكل سابك
ولا لاقي حاجة تبل ريقي...
ولا شيء يفرح....
ولا حتى عادلي فيكي مطرح
لما اتولدت وقالوا لي أمك قررت احبك
لكن عرفت معاكي إن الحب صعب...
وازاي أحبك بس أنا وأنا أكلي ضرب؟!
وغنايا غلب...
وازاي أحبك بس أنا ...واني اللي غالية واللي عالية
والبعيدة لفوق لفوق سابع سما
وأنا ابن كلب؟!
مش مستواكي
ابنك صحيح لكني مش عارف أكون على كيف هواكي
مش عارف ألبسلك ثياب النتاشين والهباشين
وأنا ابن مين ولا مين أكون علشان أعيش نايل رضاكي
علشان بأقدامي أدب؟!
لو بس مرة تفهمي...لو ليكي قلب؟
أمي الحبيبة سامحيني ياست الحبايب
ابنك خلاص...
ولا عادله حق يحب فيكي ويشتهي ولا عادله نايب
ابنك خلاص...
ماشي ف زمان اللافتات.. ماسك فُتات
بيقول يارتلي كان ف يوم م الحب جانب
كان نفسي تحميني من الزمن اللي وراني العجايب
كان نفسي أحبك وانصهر
لا أنقهر...لا أنكسر
وألاقي نفسي في النهاية فحضن قارب
ليست هناك تعليقات:
إرسال تعليق