سعات
نعيش الدنيا حافظينها ومش فاهمين
نتوه والسكة تخدعنا ونعمل إننا عارفين
بنتخبط ونتلغبط
ونرسم عمرنا مشخبط
ونكتب عالشجر تاني هنا راجعين
سعات...
تعيش العمر بندور على شيء راح
ونرسم باب لأحلامنا وننسى نرسم المفتاح
بنجري كتير ونتكعبل
نقوم دا العمر مستعجل
ونسأل مين ياناس عايش هنا مرتاح؟
سعات...
نسيب العمر يتسرسب ونرضى نعيش كما الأغراب
نسيب روحنا بتتعذب ونجلدها بألف حساب
نشد الحبل ونسيبه
وناخده كتير على عيبه
ولو حاول يكتفنا نشده علينا ونجيبه
ونعمل منه مرجيحة قصاد الباب
سعات
نحس بإننا ورقة لفوق طايرين
نسلم نفسنا ونرضى بحضن الريح شمال ويمين
نعيش الدنيا وتعيشنا
ونحضنها تكرمشنا
فنخطف منها سطورنا
ونكتب جه خلاص دورنا وكدة خالصين
ليست هناك تعليقات:
إرسال تعليق